‘मोहर’को आक्रामक व्यापार, हलमा दर्शक भेट्दै पल

नायक पल शाहको मुख्य भूमिका रहेको चलचित्र ‘मोहर’ले बक्स अफिसमा आक्रामकको व्यापार गरिरहेको छ। शुक्रबारदेखि रिलिजमा आएको यो चलचित्रले शुक्रबार औषत ओपनिङ गरेको भएपनि शनिबार भने आक्रामक देखियो । शनिबार बिहानीका शोजहरु औषत देखिएपनि मध्यान्हबाट चलचित्र हेर्ने दर्शकको भीड निकै बढेको थियो ।

मोफसलका हलहरुमा समेत दर्शकको उच्च चाप देखिएको यो चलचित्रको शोज अझै बढेको छ। नेपालगञ्जका हलहरुले हिन्दी चलचित्रको शोज कटौती गरेर ‘मोहर’को शोज थपेका हो। चलचित्रले पोखरा, बुटवल, चितवन, बिर्तामोड र इटहरीमा पनि सुखद व्यापार गरिरहेको छ ।

शनिबार दिनभर निर्देशक ओम प्रतीक, नायक पल शाह, नायिकाद्धय बेनिशा हमाल र नीति शाह काठमाडौंका हल पुगेका थिए । काठमाडौंको अष्ट नारायण हलमा दर्शकको भिड लागेको थियो । नायक पल शाहले दर्शकहरुलाई अभिवादन गर्दै धन्यवाद दिएका थिए । दर्शकको उच्च साथ र सकारात्मक वर्ड अफ माउथले आफूहरू उत्साहित भएको नायिकाद्धय बेनिशा हमाल र नीति शाहले बताए ।

त्यस्तै, आइतबार पनि चलचित्रले सुखद व्यापार गरिरहेको छ । काठमाडौं र मोफसलका हलमा आजको अकुपेन्सी पनि उच्च छ । वितरक करण श्रेष्ठले ‘मोहर’ले केही महिनादेखि देखिएको नेपाली चलचित्रको व्यापारीक खडेरीलाई चिरेको बताए ।

फिल्म मेकर्स प्रा.लिको व्यानरमा निर्माण भएको चलचित्रलाई चुम्बन जंग शाहीले लगानी गरेका हुन् । यसैबिच, नायक पल शाह आज पूर्वका विभिन्न हलमा दर्शक भेट्न पुगेका छन् । काठमाडौंका हलमा भने नायिकाद्धय बेनिशा हलमा र नीति शाह पुगिरहेका छन् । चलचित्रको वर्ड अफ माउथ बलियो भएको कारण आगामी दिनमा पनि दर्शकको साथ पाउने विश्वास निर्माणपक्षको छ ।