‘राम नाम सत्य’मा सुशीलको जोडी दिव्या

माइकल इन्टरटेन्मेन्ट हाउसको प्रस्तुतिमा तयार हुन लागेको चलचित्र ‘राम नाम सत्य’मा नायिका दिव्या रायमाझीले नेपाली फिल्म क्षेत्रका दुई एक्सन नायकहरूसँग पर्दा शेयर गर्ने भएकी छिन् ।

माइकल चन्दको निर्देशन रहने यो चलचित्रको टिम र दिव्या बीच आइतबार कागजी संझौता भएको हो । यो चलचित्र साइन गरेपछि दिव्याले भनिन्–‘यो चलचित्रको कथा बेजोड छ । मेरो भूमिका पनि निकै मन पर्यो । जसकाकारण, चलचित्रमा काम गर्न तयार भएकी हुँ ।’

यसअघि नै यो चलचित्रको लागि नायक विराज भट्ट र सुशील श्रेष्ठ फाइनल भइसकेका छन् । विराज र सुशीलसँग काम गर्न पाउँदा आफू उत्साहित रहेको दिव्याको भनाई छ ।

साउन महिनाबाट छायांकन सुरु हुने यो चलचित्रमा माइकल चन्दकै लेखन छ । उपेन्द्र शाही, स्वेता विमली र उत्तम गुरुङ फिल्मका निर्माता हुन् । फिल्ममा डाक्टर डीआर उपाध्याय र नरेन्द्र शाह कार्यकारी निर्माताको रुपमा छन् । अर्जुन पोखरेल र वावुल गिरीको संगीत रहने फिल्ममा सुशन प्रजापतिको छायांकन रहने पक्का भइसकेको छ ।

अब, केही कलाकारहरू फाइनल गरेर वर्कसप सुरु गर्ने निर्माणपक्षको भनाई छ । फिल्मलाई एक्सन, पारिवारिक, प्रेम र सस्पेन्स कथामा निर्माण गर्न लागिएको छ ।