पिताम्बर ट्रेलर: महिलामाथिको अन्याय र बदलाको कथा

आगामी चैत २९ गते प्रदर्शनमा आउने तयारीमा रहेको मल्टिस्टारर एक्सन चलचित्र ‘पिताम्बर’को ट्रेलर सार्वजनिक गरिएको छ। मंगलबार काठमाडौँमा एक कार्यक्रमको आयोजना गर्दै निर्माणपक्षले यो चलचित्रको ट्रेलर सार्वजनिक गरेको हो।

३ मिनेट १४ सेकेण्ड लामो यो चलचित्रको ट्रेलरले यसको कथावस्तु र चरित्र चित्रणबारे प्रकाश पारेको छ । महिलामाथिको अन्याय र शोषणविरुद्ध  ‘पिताम्बर’ नामक शीर्ष पात्रले खलपात्रविरुद्ध लड्ने लडाइको कथा यसले पेश गर्छ। खासमा यो चलचित्र एउटा बदलाको कथा हो ।

एक्सन, ड्रामा, रोमान्स र संवेदनाको कथा समेटिएको यो चलचित्रको केन्द्रमा महिलाविरुद्ध हुने अत्याचारको कथा समेटिएको छ । प्रदीप खड्का, सौगात मल्ल, प्रमोद अग्रहरि, दिब्यदेवको एक्सन अवतार आकर्षक देखिएको छ। सिंगो ट्रेलर प्रदीपको वरपर घुम्छ । दिब्या रायमाझीलाई उनको लभ इन्ट्रेस्टको रुपमा देखाइएको छ । एक्सन कोरियोग्राफी र भब्य प्रोडक्सन डिजाइन ट्रेलरको आकर्षक पक्ष हो ।

कृषा चौलागाईंको निर्देशन तथा विशाल चौलागाईंले निर्माण गरेको यो चलचित्रमा आर्यन सिग्देल, अनुपविक्रम शाही, सुरक्षा पन्त, गौरी मल्ल, रवीन्द्र झा, कामेश्वर चौरासिया लगायतको शीर्ष भूमिका छ ।