‘बेहुली फ्रम मेघौली’लाई हलबाट उतार्ने निश्चलको घोषणा

घटस्थापनादेखी सार्वजनिक प्रदर्शनमा आउने तयारीमा रहेको चलचित्र ‘बेहुली फ्रम मेघौली’ ओटीटी प्लाटफर्ममा रिलिज हुने भएको छ । निर्माता निश्चल बस्नेतले हलको प्रदर्शनलाई स्थगित गर्दै एमएसएम भिडियो प्लाटफर्ममा रिलिज गर्ने घोषणा गरेका हुन् ।

उनले फेसबुकमा एक स्टाटस लेख्दै विहिबारदेखि यो चलचित्र हलबाट उतार्ने घोषणा सँगै ओटीटीमा प्रदर्शन गर्ने जनाएका हुन् । हलले शो वितरणमा विभेद गरेको भन्दै उनले ओटीटीमा प्रदर्शन गर्न लागेको बताए ।

३० बर्ष उमेर पुगेकी एक युवतीको बिहेको कथा उठान गरेको यो चलचित्रको कार्यकारी निर्माताहरुमा फिरोज खड्का र शंकर पाण्डे छन् । नरेन्द्र मैनालीको छायांकन, प्रदीप लामा र केवीका खत्रीको नृत्य निर्देशन, जयन जे वाइवा र कुशल पोखरेलको संगीत रहेको चलचित्रमा निमेष श्रेष्ठको सम्पादन छ ।

सजन काफ्ले र आकाश बरालको संयुक्त लेखन तथा निर्देशन रहेको यो चलचित्रमा स्वस्तिमासहित निश्चल बस्नेत, बसुन्धरा भुषाल, विजय बराल, सिम्रन खड्का, लोकेन्द्र लेखक, सिरु बिष्ट, आमिर गौतम, रक्षा थापा लगायतको पनि अभिनय छ ।