दीपेन्द्रले थाले ‘दुखी आत्मा’को छायांकन

अभिनेता दयाहाङ राई र अभिनेत्री आँचल शर्माको मुख्य भूमिका रहेको चलचित्र ‘दुखी आत्मा’को छायांकन सुरु भएको छ । छायांकार आलोक शुक्लाले खिचिरहेको यो चलचित्रको भदौको २४ गतेबाट छायांकन सुरु गरिएको हो।

छायांकन स्थलबाट दयाहाङ राई र आँचल शर्माको दुईवटा तस्विरहरु बाहिरिएका छन् । सार्वजनिक पहिलो तस्वीरमा दयाहाङ र आँचल निकै खुशी देखिन्छन् । त्यस्तै, दोस्रो तस्वीरमा यी दुई दिल खोलेर हासेको देख्न सकिन्छ ।

यो चलचित्रको काठमाडौं उपत्यका सेरोफेरोमा नै छायांकन गरिने निर्माणपक्षले जनाएको छ । चलचित्रलाई दीपेन्द्र लामाले निर्देशन गर्दैछन् भने चलचित्रका निर्माता हिमाल कडरिया हुन् । निर्देशक लामा र निर्माता कडरियाले यसअघि ‘नाङ्गो गाउँ’मा सहकार्य गरेका थिए।

सोसियल कमेडी जनराको कथामा रहेको चलचित्रलाई क्लक वर्क कृएसन्सको ब्यानरले निर्माण गर्न लागेको हो । चलचित्रमा सुशान्त गौतमको संगीत, रामजी लामीछानेको कोरियोग्राफी र चलचित्रको प्रोडक्शन म्यानेजर सुदीप ढकाल छन् ।

चलचित्रमा दयाहाङ र आँचलका साथमा अनुपविक्रम शाही,बुद्धि तामाङ, पुस्कर गुरुङ,कविता आले,शिसिर वाङ्देल,आशान्त शर्मा,लोकेन्द्र लेखक,अंकित खड्का, लुनिभा तुलाधर,आरती आचार्य,निमा पाण्डे,इंगीहोपो कोइच सुनुवार,यासेली योङहाङलगायतले अभिनय गर्दैछन् । यो चलचित्रलाई आरआर फिल्मस्ले बितरण गर्नेछ ।