‘एक्टर’को दोस्रो पोस्टर रिलिज, प्रदीपको अनुहारभरी चोट

चलचित्र ‘एक्टर’को दोस्रो अफिसियल थिम पोस्टर रिलिज गरिएको छ । निर्माणपक्षले आज रिलिज गरेको पोस्टरमा नायक प्रदीप खड्का फिचर्ड छन् ।

सार्वजनिक पोस्टरमा प्रदीप लामो कपाल र निन्याउरो अनुहारमा देखिएका छन् । उनको अनुहारभरी घाउचोट लागेको आलो रगत छ । यसले उनी कसैको आक्रमणमा परेको प्रष्ट बुझिन्छ । कालो टिसर्टमा रहेका उनी कुनै होटेल वा पवमा रहेका हुन् कि भन्ने पृष्ठभूमी हेरेर अनुमान लगाउन सकिन्छ । तर प्रष्ट भने छैन ।

यो चलचित्रको पोस्टर हेर्दा कालो टिसर्ट, मुख्य पात्रमाथिको आक्रमण र पृष्ठभूमीको कलरले कतै चलचित्रले स्याड स्टोरी त भनेको छैन भन्ने अनुमान लगाउन सकिन्छ । तर निर्माणपक्षले स्टोरी खुलाएको छैन ।

निर्देशक राजन भुसालको निर्देशन गरेको यो चलचित्रमा प्रदीपसँगै डेव्यु अभिनेत्री दिव्या रायमाझी, आना शर्मा, राजवल्लभ कोइराला, दिव्य देव, सुशील सिटौलालगायत कलाकारको अभिनय छ । नायक खड्काले पहिलो पटक आना र दिव्यासँग सहकार्य गरेका हुन् । दिव्याको यो डेब्यु चलचित्र हो।

आगामी कात्तिक १५ गतेबाट प्रदर्शन गरिने यो चलचित्रका निर्माता थमन कुमारी भण्डारी हुन् । क्रेयटिभ प्रोडुसर मोती कार्की रहेको चलचित्रको लाइन प्रोड्युसरमा तोरन क्षेत्री, कथा आकाश बराल र राजन स्वयंले लेखेका छन् ।

अदृत फिल्मस् र मोती फिल्मस्को प्रस्तुतिमा रहेको चलचित्रलाई नरेन्द्र मैनालीले खिचेका छन् । निमेश श्रेष्ठको सम्पादन रहेको यो चलचित्रको वितरणको जिम्मा एप्पल इन्टरटेन्टमेन्ट र डिसिएनले लिएको छ ।