हमाल र नीतिपछि ‘नरसिंहाः अवतार’मा सनिसाको इन्ट्री

निर्देशक दिवाकर भट्टराईको निर्देशन रहने नयाँ चलचित्र ‘नरसिंहाः अवतार’मा नायिका सनिसा भट्टराईको इन्ट्री भएको छ । उनलाई निर्माणपक्षले बुधवार यो चलचित्रमा अनुबन्धित गरेको हो । केही दिन अगाडि यो चलचित्रको लागि महानायक राजेश हमाल र नायिका नीति शाह फाइनल भइसकेका छन् ।

नायिका सनिसा भट्टराईको यो चलचित्रमा प्रवेश भएसङै अब उनले महानायक राजेश हमाल र नीति शाह सँग पर्दा सेयर गर्नेछिन्। एक्सन प्रधान चलचित्र ‘नरसिंहाः अवतार’को स्क्रिप्टमा अहिले निर्देशक भट्टराईले काम गरिरहेका छन् ।

आगामी भदौ महिनाबाट छायांकन सुरु हुने यो चलचित्रका लागि अझै एक नायिका र एक नायकको खोजी भइरहेको निर्देशक भट्टराइले जनाए । क्रिएटिभ सिने आर्टको प्रस्तुति रहने यो चलचित्रको लगानी तीन करोडभन्दा माथि हुने बताइएको छ ।

प्रेम नगरि पोखरा लगायत आसपासका जिल्लामा छायांकन हुने यो चलचित्र मार्फल महानायक हमालले ८ बर्षपछि अभिनयमा पुन: कमब्याक गर्दैछन् ।