साउन ३२ गते रि-रिलिज हुने ‘बुलाकी’को ट्रेलर रिलिज

आगामी साउन ३२ गतेबाट रि-रिलिजमा आउने तयारीमा रहेको चलचित्र ‘बुलाकी’को ट्रेलर सार्वजनिक गरिएको छ । सोमबार काठमाडौंका एक कार्यक्रमको आयोजना गर्दै चलचित्रको ट्रेलर सार्वजनिक गरिएको हो ।

सार्वजनिक ट्रेलरमा कर्णालीको ग्रामीण जीवन र महिलाको दुःखलाई प्रस्तुत गरेको छ । यो चलचित्रका प्रस्तुतकर्ता तथा अभिनेता विराज विष्टले ‘बुलाकी’ले कर्णालीको माटो, कला, संस्कृति, भाषालाई यो चलचित्रमा उठान गरेको बताए ।

टोपेन्द्र विष्ट निर्माता र शिवराज पौडेल कार्यकारी निर्माता रहेको चलचित्रमा शिव ढकालको छायांकन, राजबहादुर सानेको लेखन तथा चलचित्र चौतारीको सम्पादन छ ।

गत वर्षको बैशाखमा रिलिजमा आएको यो चलचित्र ‘जारी’का कारण पर्याप्त शोज नपाएपछि यसका निर्माताले दुई दिनमै हलबाट उतारेका थिए । अहिले एक वर्षपछि पुन: रिलिजमा आउन लागेको हो ।

निर्देशक लक्ष्मण सुनारको निर्देशनमा निर्माण गरिएको यो चलचित्रमा रमेश बुढाथोकी, लक्ष्मी गिरी, सुशील पोखरेल, कुलदीप अधिकारी, धनबहादर राई, लक्ष्मण देवकोटा, झलनाथ खत्री, सोनु सेढाइ, प्रकाश कँडेल लगायतको पनि अभिनय छ ।