५१ दिनमा सकियो ‘छक्का पन्जा ५’को छायांकन

दीपाश्री निरौलाको निर्देशनमा तयार भएको चलचित्र ‘छक्का पन्जा ५’को छायांकन सकिएको छ। यो चलचित्रको छायांकन सुरु गरेको ५१ दिनमा सम्पूर्ण छायांकन सकिएको निर्माणपक्षले जनाएको हो ।

आमा सरस्वती मुभिज र आइएमईको प्रस्तुतिमा निर्माण गरिएको यो चलचित्रको निर्माता, लेखक तथा कलाकार दीपकराज गिरीले काठमाडौंमा चलचित्रको सम्पूर्ण छायांकन सकिएको जानकारी दिए । यो चलचित्रको अब एउटा गीतको छायांकन हुन बाँकी छ ।

काभ्रे, सिन्धुली, पोखरा र काठमाडौंमा छायांकन गरिएको यो चलचित्रको काम निकै राम्रो भएको दीपकको भनाई छ । यसपटक निर्माणपक्षले चलचित्रको छायांकनको क्रममा धेरै हल्ला गरेन । चलचित्रका अन्य कलाकारहरूको बारेमा पनि केही जानकारी दिइएको छैन ।

सामाजिक कथालाई कमेडीको शैलीबाट निर्माण गरिएको यो चलचित्रका कार्यकारी निर्मातामा कलाकार निर्मल शर्मा छन् । असोजको २४ गते फूलपातिबाट रिलिजमा आउने यो चलचित्रमा दीपकराजको साथमा केदार घिमिरे, वर्षा सिवाकोटी मुख्य भूमिकामा छन् ।