भदौ २८ बाट मंसिर ७ मा पुग्यो ‘तेल भिसा’को रिलिज

नायक विपिन कार्कीको मुख्य भूमिका रहेको चलचित्र ‘तेल भिसा’को रिलिज मिती परिवर्तन भएको छ । निर्माणपक्षले घोषणा भएदेखी नै आगामी भदौ २८ गते रिलिज गर्ने भनिएको यो चलचित्र अब मंसिर ७ मा रिलिज गर्ने बताएको हो ।

सोमबार यो चलचित्रको फस्टलुक पोस्टर सार्वजनिक गर्दै निर्माणपक्षले यो चलचित्र आगामी मंसिर ७ गते रिलिज गर्ने पक्का गरेको हो । सार्वजनिक फस्टलुकमा नायक विपिन कार्कीको दोहोरो भूमिका हेर्न सकिन्छ । साथमा, नायिका वर्षा राउत, पूजा चन्द, ऋचा शर्मा प्रस्तुत छन् ।

वेल्डन क्रियसनको ब्यानरमा ऋचा घिमिरेको प्रस्तुति रहेको यो चलचित्रको पहिलो चरणको छायांकन अमेरिकामा गरिएको थियो भने चलचित्रको दोस्रो चरणको छायांकन चितवनमा गरिने जनाइएको छ ।

निर्देशक शंकर घिमिरेको निर्देशन रहेको यो चलचित्रको अबको केही हप्तापछि दोस्रो चरणको छायांकन सुरु हुने निर्माणपक्षले जनाएको छ ।

अनिश पाण्डे र शिवराज कार्कीको लगानी रहेको यो चलचित्रमा प्रिन्स युवराज कार्की र श्रुती दाहाल कार्यकारी निर्माता, सुशन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्वाजको संगीत, अजय खड्काको सम्पादन छ ।

यो चलचित्रमा नायक विपिन कार्कीको अलावा वर्षा राउत, ऋचा घिमिरे, पूजा चन्द लगायतका कलाकारको अभिनय छ । यो चलचित्रमा कलाकार बुद्धि तामाङको पनि मुख्य भूमिका छ ।