‘गुन्यो चोलो’ पोस्टरमा नाजिरको पारालैंगिक महिलाको अवतार

अभिनेता नाजिर हुसेनको मुख्य भूमिका रहेको चलचित्र ‘गुन्यो चोलो’को फस्टलुक पोस्टर सार्वजनिक गरिएको छ । बिहीवार निर्माणपक्षले चलचित्रको फस्टलुक पोस्टर सार्वजनिक गर्दै रिलिज मिती घोषणा गरेको हो ।

नाजिरले पहिलोपटक ‘पारालैंगिक महिला’को भूमिकामा अभिनय गरेको यो चलचित्र आगामी कात्तिक ९ गतेदेखी प्रदर्शन गरिने निश्चित भएको छ । सार्वजनिक पोस्टरमा नाजिरको लुक्स जबर्जस्त छ । उनी दुरुस्त पारालैंगिक महिला देखिएका छन् । ओठमा लिपिस्टिक, आँखामा गाजल, नाकमा नथिया र कानमा ठूलो रिङ लगाएका उनको कपाल छोटो छ । अनुहारमा निलडाम देखिन्छ भने छातीमा चोटको दाग छ । एउटा हातमा स्यान्डिल र अर्को हातमा नक्कली कपाल लिएका उनको आँखामा निराशाको भाव झल्किएको छ ।

निर्देशक भट्ट र अभिनेता हुसेनको संयुक्त पटकथा तथा संवाद लेखन रहेको फिल्मको पोस्ट प्रोडक्सनको सम्पूर्ण काम नेपालबाहिर गरिएको छ । आकाश बुढाथोकी र भि.भन्से जानुबोन निर्माता रहेको यो चलचित्रको कार्यकारी निर्मातामा जेफ्री जे वेन र स्टिभ जोन्स्टन छन् ।

यो चलचित्रमा हलिउडकी कलाकार लिजा जेरार्डले स्वर दिएकी छिन् भने ब्याकग्राउन्ड म्यूजिकको सम्पूर्ण काम हलिउडका मार्सेलो दि फ्रान्सिसीले गरेका छन् । चलचित्रका छायाँकार आलोक शुक्ला हुन् ।

समुन्द्र भट्टको निर्देशनमा तयार भएको यो चलचित्रमा नाजिरसहित सञ्चिता लुईंटेल, सुशील सिटौला, विशाल पहारी, अनुपम श्रेष्ठ, निशा बजगाईं लगायतको अभिनय छ । यो चलचित्रमा सञ्चिताले नाजिरको आमाको भूमिका निर्वाह गरेकी छिन् ।