असार ६ देखि ९ गतेसम्म नेपाल–अमेरिका फिल्म फेस्टिभल हुने

२५ जेठ २०८१ ५:३०

असार ६ देखि ९ गतेसम्म नेपाल–अमेरिका फिल्म फेस्टिभल हुने

नेपाल–अमेरिका फिल्म सोसाइटी आयोजक रहेको फेस्टिभलमा प्रदर्शन हुने चलचित्रको सूची सार्वजनिक भएको छ । नेपाल–अमेरिका अन्तर्राष्ट्रिय चलचित्र महोत्सवमा मेरिल्यान्ड राज्यमा ६ असारदेखि ९ गतेसम्म आयोजना हुने भएको हो ।

नवीन सुब्बाद्वारा निर्देशित चलचित्र ‘गाउँ आएको बाटो’ ओपनिङ र फिडेल देवकोटाको ‘द रेड सुटेकस’ समापन चलचित्रको रुपमा रहनेछन् । पाकिस्तानी मूलका अमेरिकी इराम परविन बिलालद्वारा निर्देशित ‘बाख्री’ र इरानका मिराब्बास खोस्रा विनेजेहाद निर्देशित ‘परविन’ लगायतका चलचित्र पनि देखाइने छ ।

महोत्सवमा नेपाल, अमेरिका, इरान, जर्मनी, पाकिस्तानलगायत ११ देशका कथानक, वृत्तचित्र, सर्ट र एनिमेसन गरी ३५ चलचित्र स्क्रिनिङ हुनेछन् । महोत्सव उद्घाटन र समापन मेरिल्याण्डस्थित एएफआई सिल्भर थिएटरमा हुने उक्त कार्यक्रम चार दिनसम्म चल्नेछ।

त्यस्तै, महोत्सवका चलचित्र भने एएफआई सिल्भर थिएटर र ग्रीनबेल्ट थिएटरमा प्रदर्शन हुने उल्लेख छ । फ्लोरिडाको ग्लोबल पिस फिल्म फेस्टिभलसँगको सहकार्यमा दुई चलचित्र स्क्रिनिङ हुनेछन् । यसवर्ष अमेरिकी निर्देशक रोबर्ट ई फ्रेको ‘इन सर्च अफ रिजोलुसन’ र जर्मन निर्देशक रिक मिनिकको ‘द स्ट्रेट गाइज’ स्क्रिनिङ हुनेछन् ।

महोत्सवमा राजन कठेत र सुनीर पाण्डे निर्देशित डकु–ड्रामा ‘ढोरपाटन’ र केसाङ छेतेन निर्देशित वृत्तचित्र ‘डाइभर्सिटी प्लाजा’ पनि प्रदर्शन हुनेछन् । प्रदर्शन गरिएका मध्येबाट उत्कृष्ट चलचित्रलाई विभिन्न अवार्डबाट पुरस्कृत गरिने भएको छ ।

महोत्सव अवधिभर चलचित्र र संस्कृति, महिला ‘प्यानल’ मा छलफल, फिल्म निर्माणबारे मास्टर क्लास पनि सञ्चालन हुने जनाइएको छ । मेरिल्यान्ड राज्यको ‘पाक्र्स तथा योजना आयोग’ को सहयोगमा उक्त छलफल हुने जनाइएको छ । सन् २०१७ देखि प्रत्येक वर्ष महोत्सव आयोजना हुँदै आएको छ ।

१) ग्लोबल पिस फिल्म फेस्टिभल

इन सर्च अफ रिजोलुसन (डकुमेन्ट्री, नेपाल)

द स्ट्रेट गाइज (डकुमेन्ट्री, जर्मनी)

२) स्पटलाइटः

वखरी (फिचर ड्रामा, पाकिस्तान–अमेरिका)

३) फिचर :

अलि भर्सेस अलि (डकुमेन्ट्री, इरान)

डाइभर्सिटी प्लाजा (डकुमेन्ट्री, नेपाल–अमेरिका)

मम (डकुमेन्ट्री, मेक्सिको)

नोर्चा : द अर्थक्वेक (डकुमेन्ट्री, इटाली)

ढोरपाटन– नोट विन्टर होलिडेज (डकुमेन्ट्री, नेपाल)

प्रवीण (कथानक, इरान)