जेठ २३ देखि २५ गतेसम्म ‘चौथो आदिवासी जनजाति चलचित्र महोत्सव–२०८१’ हुने

यही जेठ २३ देखि २५ गतेसम्म ‘चौथो आदिवासी जनजाति चलचित्र महोत्सव–२०८१’ को आयोजना हुने भएको छ। आदिवासी जनजाति चलचित्र महासङ्घको आयोजनामा प्रदर्शनी मार्गस्थित राष्ट्रिय सभागृहमा हुने भएको हो ।

सोमबार महासङ्घले राजधानीमा एक कार्यक्रमको आयोजना गर्दै महोत्सवबारे जानकारी दिएको हो । ‘महासङ्घले स्थापना कालदेखि नै महोत्सवलगायतका आदिवासी जनजाति चलचित्र प्रवर्द्धनसम्बन्धी कार्यक्रम गर्दै आएको हो। कोरोना महामारीका कारण तेस्रो संस्करणपछि महोत्सव आयोजना गर्न सकिएको थिएन । अहिले आएर पुनः निरन्तरता दिन लागेका छौ ।’ महासङ्घका अध्यक्ष पुर्खाजित राईले भने ।

उनले आदिवासी जनजाति चलचित्रको प्रवर्द्धन गर्ने उद्देश्यले महोत्सव आयोजना गरिएको भन्दै मुलुकको अर्थतन्त्र बलियो बनाउन र राष्ट्रको सांस्कृतिक पहिचानलाई जोगाइ राख्न आदिवासी जनजाति चलचित्रको ठुलो भूमिका रहेको भए पनि राज्यले चासो नदिएको उनको भनाइ छ।

महोत्सवले आदिवासी जनजातिका मौलिक कला, संस्कृति, भाषा, धर्म, परम्परा र लोक प्रथाको दस्तावेजीकरण एवं संरक्षण र प्रवर्द्धनका साथै पर्यटन विकासमा टेवा पुग्ने उदेश्यले यो कार्यक्रम गर्न लागिएको आयोजक बताउछ ।

महोत्सवमा प्रदर्शन हुने उत्कृष्ट चलचित्रलाई नगद २० हजार, उत्कृष्ट वृत्तचित्रलाई १० हजार, उत्कृष्ट सर्ट फिल्मलाई १० हजार रुपैयाँसहित प्रमाणपत्र प्रदान गरिनेछ । यस्तै, पब्लिक च्वाईस अवार्ड पाउनेलाई ३५ हजार रुपैयाँ पुरस्कार प्रदान गरिने आयोजकले जनाएको छ । चौथो संस्करणमा फिचर, छोटो चलचित्र डकुमेन्ट्रीसहित नौ वटा चलचित्र प्रदर्शन गरिनेछ ।