‘सतीदेवी’को दोस्रो पोस्टर सार्वजनिक

अभिनेत्री मलिका महत अभिनित चलचित्र ‘सतीदेवी’को दोस्रो पोस्टर सार्वजनिक गरिएको छ । सार्वजनिक गरिएको दोस्स्रो पोस्टरमा अभिनेत्री मलिका महतले शिशुलाई स्तनपान गराइरहेकी छन् भने उनको छेवैमा दुई बाल कलाकार हर्षिका वली र मन्जिला बाँनियाँ रोइरहेको अवस्थामा प्रस्तुत छन् ।

निर्देशक लक्ष्मण सुवेदी निर्देशित यो चलचित्रको पोस्टर सोमबार सार्वजनिक गरेको हो। यसअघि सार्वजनिक पोस्टरमा उनी कालोमोसो र जुत्ताको माला लगाएर लखेटिरहेको अवस्थामा प्रस्तुत थिइन् ।

लभर गर्लको भूमिकामा देखिँदै आइरहेकी उनको यो पोस्टरले एसपटक उनी आमाको भूमिकामा रहेको बुझ्न् सकिन्छ । साउन ४ गतेबाट प्रदर्शन हुने यो चलचित्रको पोस्टरमा ‘छोरी पुजौं, छोरी बुझौं, यिनै सारा संसार’ उल्लेख गरिएको छ ।

दिलाशा क्रियसन र गोल्डेन स्टेट मुभी मेकर्स एलएलसी क्यालिफोर्नियाको सहकार्यमा निर्माण भएको यो चलचित्रमा दिलासा र साराको संयुक्त प्रस्तुति छ। यो चलचित्रले सौराह दक्षिण एसियाली फिल्म फेष्टिभलमा सर्वोत्कृष्ट फिल्म, शिव रेग्मी सर्वोत्कृष्ट निर्देशक तथा तेस्रो नेपाल ग्रामिण फिल्म फेष्टिभलमा सर्वोत्कृष्ट फिल्म, सर्वोत्कृष्ट स्क्रिप्ट र सर्वोत्कृष्ट अभिनेत्री जुरी मेन्सन अवार्ड जितेको छ ।

निर्देशक सुवेदी स्वयंको स्क्रिप्ट लेखन तथा निर्माण रहेको यो चलचित्रले बाबु र छोरीहरुबीचको सम्बन्धको आयामलाई मियो बनाएर कथा भनेको छ । बाबु श्रेष्ठले छायांकन, दीपक शर्मा र सुवास भुसालको संगीत तथा रामजी लामिछानेको कोरियोग्राफी रहेको छ । यो चलचित्रको वितरण काठमाडौं उपत्यकामा रिच इन्टरटेन्टमेन्ट र उपत्यकाबाहिर एफडी कम्पनीले गर्नेछ ।

रमेश बुढाथोकी, भोलाराज सापकोटा, कुलदीप अधिकारी, सन्दीपबाबु लोहनी, सृजना अधिकारी, मनिषा सापकोटा, सन्देश लिम्बू, सुजिता सिवाकोटी, तुलसी श्रेष्ठ, जयन्त रेग्मी आदिको पनि अभिनय रहेको चलचित्रको निर्मातामा श्रीदेवी, दिलासा र सारा सुवेदी छन् ।