‘सानो संसार’मा ‘माग्ने बुढा’की श्रीमती सीतादेवीको डेब्यू

सिद्धार्थ पुडासैनीको निर्देशनमा तयार हुने चलचित्र ‘सानो संसार’को शुभसाइतसँगै छायांकन गरिएको छ। शुक्रबार कमलादीमा रहेको गणेश मन्दिरमा आयोजित समारोहमा पूजाआजा गर्दै यो चलचित्रको छायांकन सुरु गरिएको हो ।

निर्माता अर्जुन कुमारले निर्माण गर्ने यो चलचित्रमा कलाकार केदार घिमिरे ‘माग्ने बूढा’की श्रीमती सीतादेवी तिमल्सिनाले ठुलोपर्दामा डेब्यू गर्ने भएकी छिन् । यो चलचित्रमा उनी शीर्ष भूमिकामा देखिन लागेकी हुन् ।

यो चलचित्रको शुभसाइत समारोहमा माग्ने बूढा पनि श्रीमतीलाई शुभकामना दिन उपस्थित थिए । कार्यक्रममा उपस्थित उनले कलाकारको रुपमा आफूले श्रीमतीलाई सहयोग गर्ने प्रतिवद्दता जनाए। त्यस्तै, सीतादेवीले पनि चलचित्र अभिनय आफ्नो रुचि रहेको भन्दै श्रीमानको साथ राम्रो पाएको बताइन् ।

पारिवारिक कथावस्तुमा निर्माण गरिने यो चलचित्रले सानो परिवार बिचको रमाइलो कथा भन्नेछ। यो चलचित्रमा राज पंगेनी शर्मा, अनु दाहाल, अन्जना रिसाल र शिशिर सिवाकोटीको मुख्य भूमिका छ ।

काठमाडौं र आसपासका क्षेत्रमा खिचिने यो चलचित्रको छायांकन जेठको अन्तिमबाट सुरु गरिने निर्माता अर्जुन कुमारअले बताए। यो चलचित्रको नियन्त्रक निर्मातामा शंकर पाण्डे छन्।