प्रचारमा नयाँपन ल्याउदै ‘मनसरा’ टिम

कवि तथा निर्देशक उपेन्द्र सुब्बाको लेखन तथा निर्देशन रहेको चलचित्र ‘मनसरा’को टिमले प्रचार प्रसारमा नयाँ शैली अपनाएको छ। चलचित्र रिलिज मिती नजिकिएसङै तीव्र प्रचारका क्रममा यसको टिम देश दौडाहामा छ । चलचित्र निर्माण टिमले यसअघि पोखरा र बुटवलमा कविता कन्सर्ट गरेर अहिले पूर्वी नेपालमा कविता सुनाइरहेको छ ।

पूर्वी नेपालको बिर्तामोडबाट सुरु भएको कविता कन्सर्ट इटहरी पुगेर सकिनेछ । कवि तथा निर्देशक उपेन्द्र सुब्बाले बिर्तामोडमा आधा दर्जन भन्दा बढी कविता सुनाएका थिए । कार्यक्रममा नायिका मिरुना मगरले आफ्नी आमाले रचना गरेको कविता सुनाएकी थिइन् । नेपाली चलचित्र क्षेत्रका लागि यो प्रचार शैली एकदमै नयाँ हो।

कलाकारहरू मेनुका प्रधान, प्रवीण खतिवडा, जीवन बरालले कवि सुब्बाले लेखेका कविता वाचन गरेका थिए । चलचित्रको टिमले आज इटहरी र बेलबारीमा कविता कन्सर्ट गर्दै मोफसलको प्रचारलाई टुङ्ग्याउने निर्माणपक्षले जनाएको छ।

वैशाखको २१ गतेबाट रिलिजमा आउन लागेको यो चलचित्रमा शैलेन्द्रध्वज कार्कीको छायांकन तथा निर्माण छ । विष्णु कुमार लिम्बु, मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ सह–निर्माता हुन् । त्यस्तै, यो चलचित्रमा निमेष श्रेष्ठको सम्पादन र सिजन दाहाल कार्यकारी निर्माता हुन्।

यो चलचित्रमा नायक दयाहाङ राई, नायिका मिरुना मगर, कलाकारहरू प्रवीण खतिवडा, मेनुका प्रधान, हेमन्त वुढाथोकी, शान्ति गिरी, नेनहान राइको अभिनय छ ।