दयाहाङ र मिरुनाको ‘रङ्गेली’ प्रिमियर सम्पन्न

आगामी शुक्रबारबाट सार्वजनिक प्रदर्शनमा आउने चलचित्र ‘रङ्गेली’को प्रिमियर गरिएको छ। बुधवार काठमाडौंको बीग मुभिजमा आयोजना गरिएको उक्त प्रिमियर हेर्न चलचित्रकर्मी, पत्रकार तथा विभिन्न क्षेत्रका व्यक्तिहरू पुगेका थिए ।

३ घन्टा लामो रहेको उक्त चलचित्रको प्रिमियर प्राविधिक कारणले बेलुकी ८ बजे मात्र सुरु भयो। जसका कारण चलचित्रको प्रिमियर हेर्न आएका अतिथीहरुले करिब ८ घन्टा समय हलमा बिताउनु पर्यो । प्रिमियर सकिदा रातको ११ बजेको थियो।

चलचित्र प्रिमियरका लागि भनेर मुख्य नायक–नायिका दयाहाङ राई र मिरुना मगर पुर्वी रुकुमबाट काठमाडौं आइपुगेका थिए । प्रिमियरमा यसका मुख्य दुई कलाकार दयाहाङ राई र मिरुना मगर आकर्षणको रुपमा रहे ।

चलचित्रको प्रिमियर हेरेका अधिकांशले यो चलचित्रको खुलेर नै तारिफ गरेका थिए । मोरङको रंगेली भन्ने ठाउँमा हुने ग्याङ स्टारको कथालाई यो चलचित्रले प्रस्तुत गरेको छ ।

अर्जुन सुवेदी निर्देशन रहेको चलचित्रमा सुशान्त गौतम र हर्कुलस बस्नेतको संगीत, सुशन प्रजापतिको छायांकन छ । जितेन्द्र खतिवडा र अनुज जंग थापा कार्यकारी निर्माता रहेको चलचित्रको संसार चौलागाई र रमेश भट्टराई निर्माता हुन् । युवक कार्की र शिव शंकर चौलागाई सह–निर्माता रहेको चलचित्रमा विवेक खड्का एसोसियट निर्माताको रुपमा छन्।

दया र मिरुनाको अलावा चलचित्रमा अर्पण थापाको मुख्य भूमिका छ । चलचित्रमा प्रवीण खतिवडा, रमेश वुढाथोकीको पनि अभिनय छ ।