‘गोर्खा वारियर’को दोस्रो ट्रेलर सार्वजनिक

यही फागुन ११ देखि प्रदर्शन गरिने चलचित्र ‘गोर्खा वारियर’ दोस्रो ट्रेलर सार्वजनिक गरिएको छ । सार्वजनिक दोस्रो ट्रेलरमा पात्रको मानवीय र सामाजिक पक्षलाई शीर्ष कलाकारद्वय रितेश चाम्स र रेविका गुरुङको सम्बन्ध र उतारचढावलाई पर्दामा देख्न सकिन्छ। चलचित्रलाई निर्देशक मिलन चाम्सले निर्देशन गरेका हुन्।

सार्वजनिक ट्रेलरमा विजय लामा, रियर राई लगायतका सहायक चरित्र पनि देखिएका छन् । यो चलचित्रलाई यसअघि बेलायतको लण्डन र सुनसरीको धरानमा प्रिमियर गरिएको छ । सोमबार पोखरामा प्रियिमर हुँदैछ भने काठमाडौंमा बुधबार गर्ने तयारी छ । नेपालमा प्रदर्शन गर्नुअगाडि नै बेलायतमा प्रिमियर गरेर अन्तर्राष्ट्रियरूपमा चर्चामा छ।

निर्देशक चाम्सले चलचित्रमा सन् १९४९ को समय देखाउन उक्त समयमा युद्धमा प्रयोग भएका वस्तु नै विभिन्न सङ्ग्रहालयबाट ल्याएर प्रयोग गरिएको जानकारी दिए । यसमा मुख्य भूमिका निर्वाह गरेका अभिनेता रितेश चाम्स आफैँ पूर्वगोर्खा सैनिक भएता पनि चलचित्रका लागि विभिन्न प्रशिक्षण लिएको बताए ।

चलचित्र ‘गोर्खा वारियर’ मा सन् १९४९ मा मलाया जङ्गलमा बेलायती सेनामा आबद्ध गोर्खा सैनिकले लडेको लडाइँको कथा प्रस्तुत गरिएको छ । चलचित्रमा विजय लामा, रेविका गुरुङ, शिशिर बाङ्देल, कविता आले, विरुप घले, सारा राईलगायत कलाकारको अभिनय रहेको छ । चलचित्रलाई रिच इन्टरटेन्मेन्टका करण श्रेष्ठले वितरण गर्दै छन् ।