‘रङ्गेली’मा रोमान्टिक दया र मिरुनाको जोडी

महाशिवरात्रि अर्थात यही फागुन २५ गतेबाट देशव्यापी रिलिज हुने चलचित्र ‘रङ्गेली’को जोडी दया र मिरुनाको दुई रोमान्टिक तस्वीरहरु सार्वजनिक गरेको छ । चलचित्र रिलिज मिती नजिकिएसँगै निर्माणपक्षले यि दुइको रोमान्टिक तस्वीर सार्वजनिक गरेको हो। सुकेको खुर्सानी र सुकेको परालमा बसेको दुई सार्वजनिक तस्वीरमा यो जोडीलाई रोमान्टिक मुद्रामा देख्न सकिन्छ।

यो चलचित्रमा दया र मिरुना श्रीमान–श्रीमतीको भूमिकामा देखिदैछन् ।त्यस्तै, नेपाली चलचित्र क्षेत्रमा नायक दयाहाङ राई र नायिका मिरुना मगरको जोडी अहिलेको समयमा सर्वाधिक सफल मानिन्छ । यी दुईले अभिनय गरेका तीन चलचित्रले सुपरहिटको व्यापार गरेपछि चर्चा पनि बढेको हो ।

चलचित्रमा सुशान्त गौतम र हर्कुलस बस्नेतको संगीत, सुशन प्रजापतिको छायांकन छ । जितेन्द्र खतिवडा र अनुज जंग थापा कार्यकारी निर्माता रहेको चलचित्रको संसार चौलागाई र रमेश भट्टराई निर्माता हुन् । युवक कार्की र शिव शंकर चौलागाई सह–निर्माता रहेको चलचित्रमा विवेक खड्का एसोसियट निर्माताको रुपमा छन्।

दया र मिरुनाको अलावा चलचित्रमा अर्पण थापाको मुख्य भूमिका छ । अर्जुन सुवेदीको लेखन तथा निर्देशन रहेको चलचित्रमा प्रवीण खतिवडा, रमेश वुढाथोकीको पनि अभिनय छ ।