आउँदो दशैँमा निश्चल र स्वस्तिमाको ‘बेहुली फ्रम मेघौली’ प्रदर्शन

निश्चल बस्नेत र स्वस्तिमा खड्काको निर्माण तथा अभिनय रहने चलचित्र ‘बेहुली फ्रम मेघौली’ आउँदो बर्षको दशैँमा प्रदर्शन हुने भएको छ । यदि, घोषणा गरिएका सबै चलचित्र प्रदर्शन भए भने आउँदो बर्षको दशैँमा चलचित्रहरुको भिडन्त आक्रामक हुने देखिएको छ । आउँदो बर्षको दशैँलाई लक्षित गर्दै ‘छक्का पन्जा ५, बलिदान र गाउँ नै रमाइलो’का निर्माताले प्रदर्शन मिति तय गरिसकेका छन् भने यो भिडमा ‘बेहुली फ्रम मेघौली’ पनि मिसिएको हो ।

चलचित्रको नाम घोषणा भएसँगै चर्चामा रहेको यो चलचित्रको छायांकन फागुनको दोस्रो साताबाट चितवनको मेघौलीमा सुरु हुनेछ । नायिका स्वस्तिमा खड्का पहिलो पटक यही चलचित्रबाट निर्माता बन्दैछिन् ।

यो चलचित्र वितरणको जिम्मा डीसीएनले लिएको छ । यो चलचित्रलाई निर्देशन आकाश बरालले गर्दैछन् । आकासले चलचित्र ‘दिमाग खराब’को स्क्रिप्ट लेखेका थिए ।