दीपेन्द्रले घोषणा गरे ‘के घर के डेराः घर नम्बर २’

निर्देशक दीपेन्द्र के खनालले आफ्नो निर्देशनमा बन्न लागेको नयाँ चलचित्र ‘के घर के डेराः घर नम्बर २’ निर्माणको घोषणा गरेका छन् । सामाजिक संजालबाट उनले आउँदो बर्षमा छायांकनमा जाने चलचित्रको घोषणा गरेका हुन् । यो चलचित्रको कथालाई बुद्धिसागरले लेखेका हुन् ।

चलचित्रको प्रदर्शन मिति समेत तय गरिएको छ । यो चलचित्रलाई आउँदो बर्षको तिहारमा रिलिज गर्ने घोषणा निर्माणपक्षले गरेको छ । ए प्लस इन्टरटेन्मेन्टसँग नटराज क्रियशनले सहकार्य गर्दै यो चलचित्रको निर्माण गर्न लागेको हो ।
चलचित्र ‘के घर के डेराः घर नम्बर २’ले मनोरञ्जन मात्र नभएर गहन कथालाई बोल्ने निर्देशक खनालको भनाई छ ।

निर्देशक खनालले यो चलचित्रको छायांकन अगाडि २ वटा चलचित्रको छायांकन सक्नेछन् । उनले, तत्काल चलचित्र ‘मेयर’को छायांकन सुरु गर्नेछन् । यसपछि, उनले आफ्नै होम प्रोडक्शनको एक चलचित्र निर्देशन गर्ने तयारी गरेका छन् । दीपेन्द्रले आउँदो बर्ष चलचित्र ‘पशुपति प्रसाद ३’को पनि निर्देशन गर्दैछन् । यसरीहेर्दा, उनको हातमा ४ वटा चलचित्रको लाइनअप छ ।