भदौ १ मा ३ फिल्म, थपियो ‘जुलेबी’ पनि

भदौको १ गते ३ वटा फिल्म रिलिज हुने पक्का भएको छ । चार महिला पात्रको प्रेमकथामा आधारित फिल्म ‘जुलेबी’ले समेत भदौ १ गते रिलिज हुने भएपछि यो मितिमा ३ फिल्म आउने पक्का भएको हो ।

यो मितिमा यसअघि नै ‘हिड्दा हिड्दै र नम्बरी सुन’ आउने पक्का भैसकेको छ । फिल्म ‘जुलेबी’को निर्माण टिम र डीसीएनबिच कागजी संझौता भएको हो । यस्तै, यो चलचित्रको डिजिटल राइट्स डीआर मुभिजले खरिद गरेको छ ।

यो चलचित्रमा उषा रजक, सुरक्षा पन्त, निशा अधिकारी र मोनिका थापा छन् । चलचित्रमा सुशिल सिटौला, पुष्कर कार्की, तुफान थापा लगायतका कलाकारको पनि अभिनय छ । एन्थोलोजी जनरामा तयार भएको यो चलचित्रले तीन घटनालाई चित्रण गर्ने चलचित्रका कार्यकारी निर्माता नवीन भट्टले जानकारी दिएका छन् ।

उनका अनुसार, तीनै घटना लभ स्टोरी कथावस्तुमा आधारित छन् । फोर क्युब इन्टरटेन्मेन्टको ब्यानरमा निर्माण भएको यो चलचित्रलाई गणेशदेव पाण्डेले निर्देशन गरेका हुन् । विवेक खड्काको छायांकन र अन्जय खड्काको सम्पादन रहेको यो चलचित्रका निर्माता आभा शर्मा नेपाल हुन् ।