भदौ १४ मा रिलिज हुने भयो मुकुन र मेनुकाको ‘गणपति’

यसअघि जेठको ५ गतेबाट रिलिज हुने भनिएको चलचित्र ‘गणपति’ अब भदौको १४ गतेबाट रिलिज हुने भएको छ । जेठ ५ गतेबाट रिलिज हुने भनिएतापनि विविध कारणले गर्दा यो चलचित्रलाई निर्माणपक्षले निर्धारित मितिमा रिलिज गर्न सकेन । तर, अब फिल्मको जिम्मा निर्माता लक्ष्मण रिजालले लिएपछि नयाँ प्रदर्शन मिति तय गरिएको हो ।

यो फिल्ममा मुकुन भुषाल र मेनुका प्रधान मुख्य भूमिकामा छन् । फिल्मको गीत र टिजर सार्वजनिक भैसकेको छ । आस्थाको रुपमा रहेका भगवान् र भौतिक रुपमै पृथ्वीमा रहेको मानिसबिचको फरक देखाउने कथामा बनेको यो चलचित्रमा मुकुन भुषाल, मेनुका प्रधानको साथमा जयनन्द लामा, कविता न्यौपाने, सूर्यमाला खनाल, प्रकाश घिमिरे, राजाराम पौडेल, पुष्कर गुरुङ लगायतका कलाकारको अभिनय छ ।

सविन अधिकारीको लेखन तथा निर्देशनमा तयार भएको चलचित्रमा लक्ष्मण रिजालको नाम जोडिएको छ भने कार्यकारी निर्माताको रुपमा विज्ञान केसी र अरविन्द्र गिरी छन् । यो चलचित्रमा हरिबहादुर घलेको छायांकन, अनिस अधिकारीको शब्द तथा संगीत छ ।