साउथ चलचित्र ‘कान्तरा’ले बलिउड चलचित्रका दर्शकलाई अचम्मित बनाइदिएको छ । कन्नड भाषाको यो चलचित्र रिलिज भएको एक सातापछि मात्र हिन्दी भाषामा डब भएको थियो । हिन्दीमा डब भएर भारतमा रिलिज गरिएको या चलचित्रले चौथो हप्ता झनै आक्रामक व्यापार गरेको छ ।
अजय देवगण, अक्षय कुमार जस्ता बलिउड स्टारको चलचित्रले हावा खाएको समयमा यो चलचित्रले भने हिन्दी भाषामा ५० करोडको आँकडा पार गरेको छ । चलचित्रले चौथो हप्ताको शुक्रबार २.१० करोडको व्यापार गर्यो ।
हिन्दी भाषामा यो चलचित्रले हालसम्म ५३ करोडको व्यापार गरिसकेको छ । चलचित्रको व्यापार २ करोड भन्दा तल झरेको छैन । अझ, चलचित्रले पहिलो भन्दा दोश्रो हप्तामा राम्रो व्यापार गर्यो । चौथो हप्ताको व्यापार झनै बढी हुने अपेक्षा गरिएको छ ।
रिसब सेट्टीको अभिनय तथा निर्देशनमा तयार भएको चलचित्रलाई विश्वभरका दर्शकले रुचाएका छन् । नेपालमा पनि यो चलचित्रले सुखद कमाई गरिरहेको छ ।