‘महापुरुष’को ‘बेमौसमी’ गीतमा हरिवंश र गौरीको प्रेम

चलचित्र ‘दाल भात तरकारी’पछि कलाकारद्धय हरिवंश आचार्य र मदनकृष्ण श्रेष्ठ नयाँ चलचित्र ‘महापुरुष’मार्फत दर्शकमाझ आउँदैछन् । छठको अवसर पारेर यो चलचित्र कार्तिकको ११ गतेबाट विश्वबजारमा रिलिज हुँदैछ ।

यो चलचित्रको दोश्रो गीत ‘बेमौसमी’ आज पत्रकार सम्मेलनको आयोजना गर्दै सार्वजनिक गरिएको छ । षट्कोण आर्टस्को प्रस्तुतिमा तयार भएको चलचित्रको यो गीतमा एसडी योगी र रेश्मा पुनको स्वर, एसडी योगीको संगीत, राम अबिरल बिष्टको शब्द छ ।

चलचित्रको यो गीतमा मुख्य कलाकारहरु हरिवंश आचार्य, गौरी मल्ल, अरुण क्षेत्री, अन्जना बराइलीलाई फिचरिङ गरिएको छ । भिडियोमा विवेक रसाइलीको निर्देशन, प्रमोद भण्डारीको कोरियोग्राफी, पुरुषोत्तम प्रधानको छायांकन छ ।
चलचित्रमा मदनकृष्ण श्रेष्ठ, रविन्द्र सिंह बानियाँ, राजाराम पौडेल, सिरु बिष्ट, कोपिला थापा लगायतका कलाकारको अभिनय छ ।

‘जात्रा, शत्रुगते र जात्रै जात्रा’ जस्ता चलचित्र निर्देशन गरेका निर्देशक प्रदीप भट्टराइले यो चलचित्रको निर्देशन गरेका हुन् । चलचित्रमा प्रदीपकै कथा छ । दीपेश खत्रीको लगानी रहेको चलचित्रमा रविन्द्र सिंह बाँनियाँ कार्यकारी निर्माताको रुपमा छन् । चलचित्रमा दीपक बज्राचार्यको छायांकन, मित्र डी गुरुङको सम्पादन छ ।

यो चलचित्रले समाजका महापुरुषहरुको खोजी गर्ने निर्देशक भट्टराइको भनाई छ ।