‘हिजो आजका कुरा’को ट्रेलरमा घर–घरको कथा

असोजको २८ गतेबाट रिलिज हुन लागेको चलचित्र ‘हिजो आजका कुरा’को ट्रेलर आज पत्रकार सम्मेलनको आयोजना गर्दै सार्वजनिक गरिएको छ । पन्त फिल्म प्रोडक्शनको प्रस्तुतिमा तयार भएको यो चलचित्रले ४ पुस्ताका परिवारको कथा भन्छ ।

विशेषगरि, बिदेशीन वाध्य परिवारका सदस्यहरुको पीडा चलचित्रमा छ । चलचित्रमा सन्तोष पन्त, रमा थपलिया, केकी अधिकारी, ऋचा शर्मा, दिव्य देव पन्त, साकार पन्त, रीमा विश्वकर्मा, जयनन्द लामा लगायतका कलाकारको अभिनय चलचित्रमा छ ।

चलचित्रमा प्रतिभा पन्त कार्यकारी निर्माताको रुपमा छिन् । सन्तोष पन्त र साकार पन्तको निर्माणमा तयार भएको चलचित्रमा रवि सायमीको छायांकन, साकार पन्तको निर्देशन छ । यो चलचित्रमा कविराज गहतराजको कोरियोग्राफी, विनय कंसकारको सम्पादन, दीपक शर्मा र हर्कुलस बस्नेतको संगीत छ ।

लकडाउन अगाडि नै निर्माण भएपनि कोरोनाका कारण यो चलचित्र रिलिज हुन ढिलाई भएको हो । कार्यक्रममा बोल्दै निर्माता तथा कलाकार सन्तोष पन्तले भने–‘चलचित्रमा नयाँ केही पनि छैन । तर, यो घर घरको कथा हो । चलचित्रको प्रस्तुतिमा नयाँपन छ । एकपटक यो चलचित्र हेर्नुहोला, आफ्नै कथा भेट्नुहुनेछ ।’