‘मिस मार्टिनी सन एन्जल’को टाइटल आश्मालाई, स्विमसुटमा ‘मिस यूनिभर्स नेपालका’ प्रतिस्पर्धी

नग्मा श्रेष्ठ केन्द्रिय निर्देशक रहेको ‘मिस यूनिभर्स नेपाल २०२२’को फाइनल नजिक आउँदै गर्दा अन्तिम प्रतिस्पर्धा गरिरहेका २० जना यूवतीहरुको ढुकढुकी पनि बढिरहेको छ ।

नेपाल तथा विदेशबाट समेत आएका यूवतीहरुले बिहिबार बेलुकी काठमाडौंमा आयोजना गरिएको ‘मिस मार्टिनी सन एन्जल’ विधामा र्याम्प नापेका छन् । उनीहरुले स्विमसुट र कक्टेल पहिरन लगाएर र्याम्प नापेका थिए । उनीहरुको हिडाई, पहिरन स्टाइल, आत्मविश्वासको आधारमा निर्णायकहरुले उत्कृष्ट छनोट गरेका छन् ।

‘मिस यूनिभर्स नेपाल २०२२’को एक टाइटलमा रहेको ‘मिस मार्टिनी सन एन्जल’को उपाधि आश्मा केसीले जितिन् । अष्ट्रेलियाबाट आएकी आश्माले सबैजना प्रतिस्पर्धी उस्तै रहेको भन्दै आफूमा केही फरक देखेर निर्णायकले विजेता बनाएको हुनसक्ने प्रतिक्रिया दिइन् ।

मिस यूनिभर्स नेपालकी केन्द्रिय निर्देशक नग्मा श्रेष्ठ, मोडल आस्था पोखरेल, डिजाइनर तेन्जिङ भुटिया र पूर्व मिस नेपाल इशानी श्रेष्ठ ‘मिस मार्टिनी सन एन्जल’को मुल्यांकन गर्न निर्णायकको रुपमा थिए ।

यसपटकको ‘मिस यूनिभर्स नेपाल’मा तेश्रो लिङ्गीहरुको प्रतिनिधीत्व गर्दै अनु अनमोलले सहभागीता जनाएकी छन् । उनले, आफ्ना समुदायलाई हेर्ने धेरै मानिसको दृष्टिकोण परिवर्तन हुन नसकेको भन्दै ‘मिस यूनिभर्स नेपाल’को स्टेजबाट आफूले सन्देश दिन चाहेको बताएकी छिन् ।

यो शोकी केन्द्रिय अध्यक्ष नग्मा श्रेष्ठले आउँदो बर्षदेखि गर्भवती, डिभोर्सी र विवाहित महिलाले पनि ‘मिस यूनिभर्स नेपाल’मा सहभागीता जनाउन सक्ने बताएकी छिन् ।