बक्स अफिस प्रिभ्यूः उत्कृष्ट समीक्षामा भर पर्नेछ ‘पानी फोटो’को व्यापार

जेठ १३ बाट रिलिज भएको चलचित्र ‘कबड्डी ४’ले बक्स अफिसमा बम्पर व्यापार गरिरहँदा त्यसपछि रिलिज भएका चलचित्रले सुखद कमाई गर्न सकेका छैनन् । यसैले, शुक्रबार अर्थात साउनको १३ गतेबाट रिलिज हुन लागेको चलचित्र ‘पानी फोटो’ माथि आम दर्शक र चलचित्रकर्मीको नजर परेको छ । बक्स अफिसमा चलचित्रको व्यापार सिथिल बनेको समयमा यो चलचित्रले केही राहत दिन्छ कि भन्ने आशा आम चलचित्रकर्मीमा छ ।

खगेन्द्र लामिछाने निर्देशित यो चलचित्रले माओवादी जनयुद्धको समयमा वेपत्ता भएको छोराको पर्खाइमा बसेका बाबु र आमाको कथा भन्छ । यसअगाडि यस्तै कथा भनिएको ‘दोख’ र अर्गानिक कथामा बनेको ‘चिसो मान्छे’ले व्यापार नगरेको कारणले पनि ‘पानी फोटो’को इनिसियल व्यापारमा शंका गर्ने ठाउँ छ ।

यो चलचित्रले राम्रो व्यापार गर्नका लागि यसको वर्ड अफ माउथमै भर पर्नुपर्ने देखिन्छ । मल्टिप्लेक्समा यो चलचित्रमाथि प्रदर्शकको विश्वास केही हदसम्म छ । तर, दर्शकसम्म चलचित्रको प्रचार गर्नमा निर्माणपक्षले ठूलै कञ्जुस्याँई गरेका कारण पनि चलचित्रको बारेमा ठूलो संख्याका दर्शकलाई थाहा छैन ।

चलचित्रले पहिलो दिन ठूलो अंकगणितिय व्यापार गर्ने संभावना छैन । चलचित्रले २ डिजिटको कमाई गरेपनि त्यो लोभलाग्दो हुने कुरामा शंका व्यक्त गर्न सकिन्छ ।

तर, खगेन्द्र लामिछाने, मेनुका प्रधान, अनुप बराल, मलिका महत अभिनित यो चलचित्रले राम्रो समीक्षा पाएको खण्डमा शनिबार व्यापारमा केही राहत हुनेछ । तर, चलचित्रलाई एक बलिउड र एक साउथ चलचित्रको चुनौती पनि यथावत् नै छ ।