अनिल सिंहको देउडा गीत ‘रेलिमोई’ सार्वजनिक

‘आइ लभ यु, प्रेम पत्र, डुब्न देउ, इन्जिन गाडीमा, प्रेमिका, मैले जानी सके’ लगायतका थुप्रै चर्चित गीतका गायक अनिल सिंहले देउडा गीत ‘रेलिमोई’ सार्वजनिक गरेका छन् । उनकै संगीत र स्वर रहेको गीतको भिडियोमा उनी स्वयम् फिचर्ड पनि छन् । सार्वजनिक गीतमा रिदमराज जोशीको शब्द छ ।

गीतमा अनिलसँगै इटालियन मोडेल मार्गोस तटेला , निर्मल सिग्देल फिचर्ड छन् । गीतको भिडियोमा सिजिआइ , भिएफएक्स र कलाकार करेक्सन सुवोध पाण्डेको रहेको छ भने यसलाई म्युजिक स्टेटले छायांकन , सम्पादन र निर्देशन गरेर तयार गरेको हो ।

झन्डै डेढ दशक अगाडि मात्र फर्किने हो भने उनले गाएका गीतसंगीतमा नझुम्ने कमै थिए । अहिले पनि स्टेज कार्यक्रममा सक्रिय अनिलको कन्सर्टमा गाउने गीत र झुम्ने दर्शकको कमी छैन । किनकी उनको गायन शैली र गीत नै त्यस्तै छ । तात्कालिन अवस्थामा उनले रकस्टारको ट्याग पाएका थिए ।

केही समय संगीतबाट विश्राम लिएका उनले ‘रेलिमोई’ सँगै आफ्नो सक्रियता बढाएका छन् । साथै , उनले आफ्नो सफल गीत ‘इञ्जिन गाडीमा २ र आइ लभ यु २’ पनि चाडै बजारमा ल्याउने तयारी गरेका छन् । गीत छिटै दर्शक समक्ष ल्याउदै छन् ।