जुम्लामा खिचिएको भन्दैमा ‘प्रकाश’लाई व्यवसायिक फिल्म होइन भन्न मिल्दैनः प्रदीप खड्का

नायक प्रदीप खड्काले भदौ १० गतेबाट रिलिज हुन लागेको चलचित्र ‘प्रकाश’ नेपाली माटोको कथा बोकेको व्यवसायिक चलचित्र भएको दाबी गरेका छन् । आज चितवनमा आयोजना भएको पत्रकार सम्मेलनमा बोल्दै उनले चलचित्र व्यवसायिक भएको दाबी गरे ।

चलचित्रका लेखक विकास सुवेदीको साथमा चितवन पुगेका प्रदीपले जुम्ला जस्तो बिकट गाउँको कथा उठाएको भन्दैमा चलचित्रलाई व्यवसायिक नभएको भन्न नमिल्ने बताए । यस्तै, चलचित्रका लेखक विकास सुवेदीले यो चलचित्र सबैको साझा कथा भएको समेत तर्क गरेका छन् । उनले, जुम्लाको एक विपन्न यूवाले सरकारी शिक्षकको जागिर खानका लागि संघर्ष गरेको कथा चलचित्रमा देखाइएपनि यो सबै नेपाली यूवाहरुको समस्या भएको जिकिर गरे ।

पत्रकार सम्मेलनमा आफू कम्फर्ट जोनबाट बाहिर निस्किर काम गरेको नायक प्रदीपको तर्क थियो । उनले, यो चलचित्रमा आफू कलाकार बन्ने प्रयास गरेको समेत सुनाए ।

उनले भने–‘चलचित्रको कथा के हो ? केही पनि थाहा थिएन । यसको वान लाइन कथा सुनेरै म काम गर्न तयार भएँ । एउटा विद्रोह भयो, द्धन्द्ध भयो । त्यसले एउटा व्यवस्था लिएर आयो । त्यसमा यस्ता कमी कमजोरी छन् जसले अर्को विद्रोह निम्त्याउन सक्छ भन्ने लाइनले म काम गर्न तयार भएको हुँ ।’ प्रदीपले यो चलचित्र आफ्ना लागि निक्कै चुनौतीपूर्ण भएपनि यसलाई अवसरको रुपमा लिएर काम गरेको बताए ।

महेन्द्र अधिकारीको लगानीमा तयार भएको चलचित्रलाई दिनेश राउतले निर्देशन गरेका हुन् । चलचित्रमा प्रदीपसँगै दिया मास्के, प्रकाश घिमिरे, राजन खतिवडा लगायतका कलाकारको अभिनय छ ।