समुन्द्रको ‘गुलाबी’मा १५ केजी तौल घटाउँदै नाजिर

नायक नाजिर हुसेनले नयाँ चलचित्र साइन गरेका छन् । नाजिरले निर्देशक समुन्द्र भट्टको निर्देशनमा बन्न लागेको नयाँ चलचित्र ‘गुलाबी’ साइन गरेका हुन् ।

यो चलचित्रको स्क्रिप्टको काम सकिएको र भदौको अन्तिम साताबाट छायांकन सुरु हुने निर्देशक भट्टले जानकारी दिइन् । नाजिर बाहेक अन्य कलाकारको टुंगो नलागेको बताउँदै उनले अडिसनबाट कलाकार छनोट गर्ने जानकारी दिइन् ।
चलचित्रका लागि नाजिरले १५ केजी तौल घटाउनुपर्नेछ । चलचित्रमा नाजिर ५० केजीको पात्रको भूमिकामा देखिन लागेका छन् ।

आलोक शुक्लाको छायांकन रहने यो चलचित्रले पारलैङ्गिक कथालाई उठाउने निर्माणपक्षले बताएको छ ।

‘आधा पेज’ निर्देशन गरेर यो क्षेत्रमा प्रवेश गरेकी समुन्द्रले करिअरको दोश्रो चलचित्रको रुपमा ‘गुलाबी’ निर्देशन गर्न लागेकी हुन् । उनले, नायिका नीता ढुंगानासँग मिलेर ‘माया’ नामक चलचित्र बनाउने तयारी गरेपनि त्यो काम अपुरै छ ।