सौगात मल्लको नाममा निर्माताले ‘घनचक्कर’मा डुबाए करोड

सौगात मल्ल अभिनित चलचित्र ‘कबड्डी ४’ले बक्स अफिसमा २२ करोड भन्दा बढीको ग्रस कलेक्शन गरेपछि उत्साहित भएका निर्माता हरि भट्ट अहिले भने निराश छन् । किनकी, उनले निर्माण गरेको चलचित्र ‘घनचक्कर’ रिलिज भएको २ दिनमै हलबाट उत्रिएको छ । यतिमात्र होइन, यो चलचित्रबाट उनलाई करोड घाटा समेत लागेको छ ।

शुक्रबारदेखि रिलिज भएको यो चलचित्रले दर्शकलाई तान्न सकेन । आइतबारबाट मल्टिप्लेक्स हलबाट चलचित्र उत्रियो । चलचित्रले ५ लाख ग्रस कलेक्शन गरेको वितरक सुनिल मानन्धरको भनाई छ । सौगात मल्लको नाममा पनि यो चलचित्र हेर्न दर्शक हलसम्म पुगेनन् । चलचित्रको कथावस्तु, प्रस्तुति, पटकथा पनि निक्कै कमजोर छ ।

सौगात अभिनित चलचित्र ‘मन्त्र’ पनि बैशाखमा नमज्जाले डुबेको थियो । पैसाका लागि धेरै चलचित्र खेल्दा सौगातलाई दर्शकले पत्याउन छाडेका छन् । तर, उनको हातमा चलचित्रको अभाव भने छैन ।