‘छक्का पन्जा ३’को व्यापार २० करोड होः दीपकराज गिरी

चलचित्र ‘कबड्डी ४’ले ११ दिनमै १७ करोड भन्दा माथिको व्यापार गरेको आँकडा वितरक गोविन्द शाहीले दिइरहँदा बजारमा ‘छक्का पन्जा ३’को रेकर्ड तोडिएको चर्चा समेत भएको छ । ‘छक्का पन्जा ३’ले १६ करोड कमाएको र त्यसको रेकर्ड ‘कबड्डी ४’ले तोडेको चर्चा चलेको छ ।

तर, चलचित्र ‘छक्का पन्जा ३’ले २० करोडको ग्रस कलेक्शन गरेको निर्माता तथा कलाकार दीपकराज गिरीले बताएका छन् । हाम्रो सिनेमासँग कुरा गर्दै गिरीले भने–‘छक्का पन्जा ३’को व्यापार २० करोड हो । १६ करोड पहिलो सिरिजको हो ।’

यस अर्थमा वितरकले दिएको आँकडा मान्ने हो भने ‘कबड्डी ४’लाई ‘छक्का पन्जा ३’को रेकर्ड तोड्न अझै केही दिन लाग्न सक्छ ।

रामबाबु गुरुङको निर्देशनमा तयार भएको यो चलचित्रले सुरुवाती दिनदेखि नै बम्पर व्यापार गरिरहेको छ । दयाहाङ राई, सौगात मल्ल, मिरुना मगर, वुद्दि तामाङ, बिजय बराल लगायतका कलाकारको अभिनय रहेको चलचित्रले मल्टिप्लेक्समा अझै पनि आक्रामक व्यापार गरिरहेको छ ।

तर, ‘कबड्डी ४’ र ‘छक्का पन्जा ३’का निर्माताविच भने रेकर्डको अस्वस्थ प्रतिस्पर्धा देखिन थालेको छ ।