मिरुना मगर विरुद्ध प्रदर्शन, ‘कबड्डी ४’को पोष्टर जलाइयो(भिडियो)

आइतबार चलचित्र ‘कबड्डी ४’को बिषयमा दर्शकको प्रतिक्रिया वुझ्न सिभिल मलमा पुगेकी नायिका मिरुना मगरले एक दर्शकमाथि आफूलाई अभद्र व्यवहार गरेको भन्दै थप्पड हानिन् । मिरुनाले थप्पड हानेपछि उनलाई प्रहरीको जिम्मा समेत लगाइन् । मिरुनाको उजुरीपछि प्रहरीले मुगुका फुर्वा लामालाई पक्राउ गरेर हिरासतमा राखेको छ ।

फुर्वाले आफूलाई बारम्बार छोएको भन्दै मिरुनाले थप्पड हानेकी थिइन् । चलचित्र हेर्न दर्शकको अत्याधिक भिड भएको समयमा मिरुनाले आफूमाथि अभद्र व्यवहार भएको तर्क गरेकी छिन् । तर, फुर्वाले गल्ती नै नगरि उनलाई पक्राउ गरिएको भन्दै आज काठमाडौंको चाबहिलस्थित के.एल टावरमा विरोध प्रदर्शन भएको छ ।

फुर्वाका समर्थहरुकले उनलाई तत्काल रिहा गर्नुपर्ने, चलचित्रको प्रदर्शन रोक्नुपर्ने, मिरुनाले माफी माग्नुपर्ने माग राखेका छन् । उनीहरुले, ‘मिरुना मगर मुर्दाबाद’को नारा समेत लगाएका छन् । उनीहरुले फुर्वा रिहा नभएसम्म र मिरुनाले माफी नमागेसम्म विरोध नरोकिने बताएका छन् । यस्तै, के.एल टावरसँगै अन्य केही हलमा पनि विरोध र्याली गर्ने तयारी गरिएको छ ।

फुर्वाको पक्षमा उर्लिएको आक्रोशित भीडले चलचित्रको पोष्टर समेत च्यातेको छ । यो बिषयमा चलचित्रको निर्माणपक्षले अहिलेसम्म केही पनि बोलेको छैन ।