‘चिसो मान्छे’ ट्रेलरः स्वस्तिमाको अभिनयले मन छुन्छ, संवादले आँखा रसाउँछ

९ जेठ २०७९ १२:१६

नायिका स्वस्तिमा खड्कालाई विल्कुलै नयाँ शैलीमा उतारिएको चलचित्र ‘चिसो मान्छे’को आज एक कार्यक्रमको आयोजना गर्दै ट्रेलर सार्वजनिक गरिएको छ । असारको ३ गतेबाट रिलिज हुन लागेको यो चलचित्रलाई दीपेन्द्र के खनालले निर्देशन गरेका हुन् । चलचित्रमा उनकै लेखन तथा छायांकन पनि छ ।

शर्मिला पाण्डेको लगानीमा तयार भएको यो चलचित्रलाई डी.एस डिजिटल प्रा.लिको ब्यानरमा निर्माण गरिएको हो । चलचित्रमा अर्पण थापा, स्वस्तिमा खड्का, देशभक्त खनाल, आशान्त शर्मा, प्रभाकर न्यौपाने, रामबाबु रेग्मी, झाकेन वीसी, पुष्पा अवस्ती, श्रृष्टी आचार्य, विकास खनाल लगायतका कलाकारको अभिनय छ ।

दिर्घ खड्काको सम्पादन रहेको चलचित्रमा सुभाष भुषालको संगीत छ । यो चलचित्रको ट्रेलर रिलिज कार्यक्रममा काठमाडौं महानगरपालिकाका मेयरका उम्मेदवार बालेन शाह पनि पुगेका थिए । उनले, चलचित्रको ट्रेलर उत्कृष्ट लागेको भन्दै प्रशंसा गरे । यस्तै, उनले आफू नायक अर्पण थापा र नायिका स्वस्तिमा खड्काको फ्यान भएको समेत बताए ।

नायिका स्वस्तिमा खड्काले ‘चिसो मान्छे’ आफ्नो करिअरमा आजसम्म काम गरेका चलचित्रमध्ये एउटा उत्कृष्ट अनुभव बोकेको चलचित्र रहेको बताइन् । निर्देशक दीपेन्द्र के खनालले चलचित्रले चिसो मान्छेहरुको कथा भन्ने बताए । निर्मात्री शर्मिला पाण्डेले ‘आमा’पछि दर्शकको मन छुने कथामा अर्को चलचित्र बनाएको बताइन् ।

यो चलचित्रमा नायिका स्वस्तिमा खड्का बाजुरेली महिलाको भूमिकामा देखिएकी छिन् । चलचित्रमा उनको संवाद पनि बाजुराकै छ । यसका लागि उनले भाषाको प्रशिक्षण समेत लिएकी थिइन् । चलचित्रको ट्रेलर सार्वजनिक कार्यक्रममा उनको अभिनयको प्रशंसा भएको थियो ।

काठमाडौंदेखि बाजुरासम्म बाकसमा आफ्नो श्रीमान्को लास राखेर यात्रा गरिरहेकी एक महिला र उनीसँग जोडिएका २ पात्रको वरिपरी यो चलचित्र घुमेको छ ।

Leave a Reply

Your email address will not be published. Required fields are marked *