उषाको गुनासोः पारिश्रमिक माग्दा भिख मागे जस्तो गर्छन्, को हौं तिमी भन्दै हेप्छन्(भिडियो कुराकानी)

म्युजिक भिडियोकी सफल मोडल उषा उप्रेतीले पारिश्रमिक माग्दा आफूहरुले भिख मागे जस्तो गरेर हेपिएको गुनासो गरेकी छिन् । हिट नेपालसँगको कुराकानीमा उनले भनिन्–‘सुरुमा मख्ख पारेर काम गराउने अनी पारिश्रमिक दिने बेलामा कल नै नउठाउने प्रवृत्ती बढेको छ । कसैलाई गरेको विश्वास नटुटोस् भन्ने हो । भरोसा टुटेपछि केही पनि नहुने रहेछ । मेरो त धेरै रकम लिन बाँकी छ ।’

उषाले आफूहरु यो क्षेत्रमा आएको धेरै नभएको भन्दै अग्रिम पेश्की रकम माग्दा हेपिने गरेको समेत गुनासो गरिन् । भनिन्–‘अगाडि नै केही रकमको लागि आग्रह गर्दा को हौं तिमी, हिरोइन हौं भन्दै हेप्नुहुन्छ । हामीले उहाँहरुलाई जसरी हेर्छौ, त्यसरी उहाँहरुले हेर्नु नै हुन्न । हामीले दिनभर मिहिनेत गरेका हुन्छौं । तातो घाम र चिसो पानी नभनी उफ्रिएका हुन्छौं । हामी पनि मानिस त हौं । यो त हामीले काम गरेर कमाएको सम्पत्ती हो नी । तर, हामीलाई भिख मागे जस्तो गर्नुहुन्छ । यस्तो घटना त मसँग धेरै भैसकेको छ ।’

उषाले मात्र होइन, अर्का सफल मोडल सुधिर श्रेष्ठले पनि पारिश्रमिकमा आफूलाई पनि समस्या पर्न थालेको गुनासो गरेका छन् । उनले भने–‘सुरुवातमा त मलाई अरुको कुरा सुन्दा, यस्तो पनि हुन्छ र जस्तो लागेको थियो । तर, अहिले मसँग पनि यस्तो घटनाहरु हुन थालेका छन् । निर्देशकहरुले यो बिषयमा सोचिदिनुपर्छ ।’

अर्को एक प्रसंगमा उषा र सुधिरले म्युजिक भिडियो निर्माणमा कमी आएको बताए । तर, आफूहरुले काम पाइराखेको उनीहरुको तर्क छ ।