पल प्रकरणमा नयाँ मोडसँगै पूजाले दिइन् भगवानलाई धन्यवाद

एक नाबालिका गायिकाले आफूलाई बलात्कार गरेको भन्दै नायक पल शाहविरुद्ध जिल्ला प्रहरी कार्यलय, तनहुँमा उजुरी दिएसँगै नायक पल शाह विगत केही हप्तादेखि थुनामा छन् ।

पललाई नाबालिका गायिकाले जिल्ला प्रहरी कार्यलय, नवलपुरमा पनि उजुरी दिएकी थिइन् । पुर्पक्षका लागि तनहुँको थुनामा रहेका पल शाहको बकपत्र आजबाट सुरु भएको हो । बकपत्रका क्रममा नाबालिका गायिकाले आफूलाई पलले बलात्कार नगरेको बताएकी छिन् । साथै, उनले आफूलाई जर्बजस्ती बयान दिन लगाइएको पनि अदालतसमक्ष उल्लेख गरेकी छिन् । उनले, प्रहरीले अदालतमा बुझाएको बयान आफ्नो नभएको पनि अदालतसमक्ष बयान दिएकी छिन् ।

यस्तै, उनका पिताले पनि बयान फेरेका छन् । उनका पिताले बयानका क्रममा आफूले अरुको प्रभाव र दबाबमा परेर पल विरुद्ध उजुरी दिएको बकपत्र गरेका छन् ।

पलको प्रकरणमा नयाँ घटना आएसँगै उनकी नजिककी साथी पूजा शर्माले ‘भगवान्लाई धन्यवाद’ दिएकी छिन् । पूजा र पलले चलचित्र ‘म यस्तो गीत गाउँछु २’मा काम गरेका थिए । पूजाले पल निर्दोष रहेको भन्दै मिडियामा बोलेपछि उनी विवादमा आएकी थिइन् । तर, घटनामा नयाँ मोड आएसँगै पूजाले भगवान्लाई धन्यवाद दिएकी हुन् ।