‘अटो मेसिन’का कारण रञ्जनामा ‘केजीएफ २’ लाग्दै गर्दा ‘ए मेरो हजुर ४’को गीत बज्योः नरेन्द्र महर्जन

बिहिबार काठमाडौंको न्यूरोडमा रहेको रञ्जना सिनेप्लेक्समा ‘केजीएफ २’ हेरिरहेका दर्शकले अचानक नेपाली चलचित्र ‘ए मेरो हजुर ४’को गीत हेर्नु पर्यो । नेपाली चलचित्रको गीत बजेपछि हलमा होहल्ला चल्यो ।
सामाजिक संजालमा त केही मानिसहरुले ‘ए मेरो हजुर ४’को टिमले षड्यन्त्र गरेर यस्तो भएको समेत भन्न भ्याएका छन् ।

तर, रञ्जना सिनेप्लेक्सका संचालक नरेन्द्र महर्जनले अटो मेसिनका कारण यो समस्या आएको बताए । उनले हाम्रो सिनेमासँग कुरा गर्दै भने–‘हाम्रो हलमा ३ पर्दा छन् । तिनै पर्दालाई कन्ट्रोल गर्नका लागि अटो मेसिन राखिएको छ । जसले एकै ठाउँबाट ३ वटा पर्दामा चलिरहेका चलचित्रलाई नियन्त्रण गर्न सक्छ । तर, अटो मेसिनमा काम गर्ने कर्मचारीले ३ नम्बर थिच्नु पर्नेमा २ नम्बर थिच्दा केही मिनेट यस्तो समस्या आएको हो ।’ नेपालमै पहिलो पटक अटो मेसिन हलमा प्रयोग गरिएको नरेन्द्रको कथन छ ।

‘ए मेरो हजुर ४’ २ नम्बर पर्दामा प्रदर्शन भैरहेको थियो । नरेन्द्रले भने–‘ए मेरो हजुर ४’को टिमले षड्यन्त्र गरेर यस्तो समस्या आएको भन्ने हल्ला वेकारको हो । कहिलेकाही मानिसबाट गल्ती हुन्छ । भएको यती मात्र हो ।’