जुम्ल्याहा बच्चाकी आमा बन्दै रेनशा, ‘आई एम ट्वान्टी वान’ तत्काल रिलिज नहुने

निर्माता तथा हल व्यवसायी प्रज्ज्वल शमशेर जबरासँग बैबाहिक जीवनमा बाँधिएको केही बर्षपछि निर्देशक रेनशा वान्तवा राई आमा बन्ने तयारीमा छिन् । रेनशाको गर्भमा ५ महिना दुई सन्तान हुर्किरहेका छन् । यसैले, रेनशा विगत केही समयदेखि घरमै आराम गरिरहेकी छिन् ।

गर्भमा सन्तान हुर्किरहेकाले रेनशा निर्देशित चलचित्र ‘आई एम ट्वान्टी वान’को प्रदर्शन पनि तय हुन सकेको छैन । रेनशाले सन्तान जन्माएपछि मात्र चलचित्रको रिलिजको मिति तोक्ने बताइन् ।

रेनशाले भनिन्–‘अहिले म अर्को खुशीमा छु । यसैले, चलचित्र रिलिजको लागि केही पनि तयारी गर्न पाएकी छैन । अब, सन्तानको खुशी मिलेपछि चलचित्रको बिषयमा सोच्नुपर्ला ।’ धिरज मगर, जसिता गुरुङ लगायतका कलाकारको अभिनय रहेको चलचित्रलाई डान्सको कथामा तयार पारिएको छ ।