जितु बाहिरिएपछि ‘परालको आगो’मा सौगातको इन्ट्री

सुशील पोखरेलको निर्माण रहने चलचित्र ‘परालको आगो’मा अभिनेता सौगात मल्लको इन्ट्री भएको छ। यो चलचित्रमा जितु नेपाल बाहिरिएपछि सौगातको इन्ट्री भएको हो।

यो चलचित्रमा सौगात ‘जुठे दमाई’को भूमिकामा देखिदैछन् । निर्माणपक्ष र सौगातबिच बिहिबार औपचारिक रुपमा कागजी संझौता भएको हो।चलचित्रमा प्रकाश सपुत, सुहाना थापा, सिर्जना अधिकारी, शंकर आचार्य, किशोर भण्डारी, कुलदीप अधिकारी, सरु भण्डारी, रेणु न्यौपाने, ज्याक श्रेष्ठ लगायतका कलाकारहरूले काम गर्नेछन् ।

लक्ष्मण सुनारको निर्देशन रहने यो चलचित्रको छायांकन भदौको २६ गतेबाट म्याग्दी जिल्लामा हुनेछ । सामाजिक सन्देश दिने यो चलचित्रमा संकल्प भुजेलको डीओपी, रामजी लामिछानेको नृत्य निर्देशन, सुशील देवकोटाको लेखन, शान्ति ठटाल, सत्य स्वरूप र प्रकाश सपुतको संगीत रहनेछ । यो चलचित्र आज भन्दा ४५ वर्ष अगाडि निर्देशक प्रताप सुब्बाले तयार पारिसकेका छन् ।

कथाकार गुरु प्रसाद मैनालीको चर्चित कथा ‘परालको आगो’मा आधारित रहेर तयार हुन लागेको यो चलचित्रमा यसअघि कलाकार जितु नेपालले काम गर्ने पक्का भएको थियो । तर, निर्माण टिमसँग विभिन्न कुराले असमझदारी भएपछि जितु बाहिरिएका थिए ।