‘रेशम फिलिली’को सिक्वेल ‘फेरि रेशम फिलिली’ निर्माण हुने

चलचित्र ‘रेशम फिलिली’को सिक्वेल ‘फेरि रेशम फिलिली’ निर्माण हुने भएको छ। वि.सं २०७२ सालमा रिलिज भएको यो चलचित्रको सिक्वेलको रुपमा यसको निर्माण गर्न लागिएको हो ।

निरज महर्जनले निर्देशन व्गर्ने यो चलचित्रलाई रौनकविक्रम कँडेलले निर्माण गर्दैछन्। यो चलचित्रमा नायक विनय श्रेष्ठ र नायिका सुपुष्पा भट्टको मुख्य भूमिका रहनेछ। त्यस्तै, चलचित्रमा कामेश्वर चौरासियाको पनि भूमिका रहनेछ । विनय र कामेश्वर अघिल्लो चलचित्रका मुख्य पात्र हुन् भने यसको सिक्वेलमा सुपुष्पाको प्रवेश भएको छ । ‘रेशम फिलिली’मा विनय र मेनुका प्रधानको मुख्य भूमिका रहेको थियो।

यो चलचित्रलाई आकाश बरालले लेखेका हुन् । सहनिर्मातामा सुरज बम र एनी थापा छन् । यो चलचित्र निर्माणमा विनयको कम्पनी भी–मोसन पिक्चर्स पनि जोडिएको छ भने थापा भी–मोसन पिक्चर्सकी प्रमुख तथा अभिनेता विनयकी श्रीमती हुन् । मनोज पण्डित चलचित्रका स्क्रिप्ट डाक्टर हुन् ।

सोसल–कमेडी जनरामा निर्माण हुने यो चलचित्रले वर्तमान नेपाली समाजलाई कटाक्ष गर्नेछ । अबको केहीदिनमै छायांकन सुरु हुने यो चलचित्रको पहिलो भागको ‘पिरतीको छाता’ बोलको गीत अहिले पनि उत्तिकै चर्चित छ।